ასპერგილოზი aspergillosis
ასპერგილოზი – დაავადება, რომელსაც იწვევს Aspergilles – ის სახეობის სოკო, ფილტვ-ბრონქის სისტემაში ხშირი ლოკალიზაციით.
ასპერგილოზი – ეტიოლოგია, პათოგენეზი. ასპერგილები ბუნებაში ფართოდ გავრცელებული საპროფიტებია, რომლებიც მთელი წლის განმავლობაში გამოყოფენ სპორებს. დაავადებას იწვევს ასპერგილების სპორების დიდი რაოდენობით შესუნთქვა, მაგალითად, ლპობით თივასთან, კომპოსტთან მუშაობისას. პათოგენეზში გარდა ენდოტოქსინის ალერგიული და ჰემოლიზური ზემოქმედებისა, დიდ როლს ასრულებს ორგანიზმის რეაქტიულობის დაქვეითება ხანგრძლივი და ქრონიკული დაავადებების დროს (ტუბერკულოზი, ახალწარმონაქმნი, სისხლის სისტემური დაავადებები, ალკოჰოლიზმი და სხვ.), ან იმუნოდეპრესიული პრეპარატების ხანგრძლივი მიღება.
ასპერგილოზი – სიმპტომები, მიმდინარეობა. გამოყოფენ ფილტვ-ბრონქის ასპერგილოზის 4 ფორმას. მსუბუქი ფორმა მიმდინარეობს როგორც სწრაფად გარდამავალი მწვავე ტრაქეობრონქიტი. ალერგიული ბრონქული ასპერგილოზისათვის დამახასიათებელია ფილტვის ტრანზიტორული ინფილტრატები, ეოზინოფილია, ცხელება, ბრონქოსპაზმი; ნახველს შესაძლოა ჰქონდეს მოყავისფერო ელფერი; ხასიათდება ხანგრძლივი განმეორებითი გამწვავებებითა და მძიმე ბრონქული ასთმის განვითარებით; რიგ შემთხვევებში დგება გამოჯანმრთელება. ასპერგილომა (სოკოს მიცელიუმის კოლონიები, რომელიც თავისუფლად დევს ტუბერკულოზურ კავერნაში, აბსცესის ღრუში, ბრონქოექტაზებში, ფილტვის ინფარქტის, სიმსივნის მიდამოში) შესაძლოა მიმდინარეობდეს უსიმპტომოდ, მაგრამ ხშირად აღინიშნება ხველა ნახველის გამოყოფით, სისხლიანი ხველა, წონაში დაკლება (კახექსიამდე), მაღალი ტემპერატურა, ტკივილები გულმკერდში, მდგომარეობის პროგრესული გაუარესება. ფილტვის ასპერგილოზის ნეკროზული ფორმა მიმდინარეობს გამოხატული ინტოქსიკაციით, ცხელებით.
ასპერგილოზი – დიაგნოსტიკაში გამოიყენება რენტგენოლოგიური გამოკვლევები, ნახველის დათესვა, სეროლოგიური მეთოდები.
ლიტერატურა, წყაროები, გაფრთხილება
- გაფრთხილება
- დათეშიძე ლალი, შენგელია არჩილ, შენგელია ვასილ. “ქართული სამედიცინო ენციკლოპედია”. თბილისი, 2005. “ტექინფორმის” დეპონენტი N: 1247. თეიმურაზ ჩიგოგიძის რედაქციით.
- დათეშიძე ლალი, შენგელია არჩილ, შენგელია ვასილ; “ქართული სამედიცინო ენციკლოპედია”. მეორე დეპო-გამოცემა. ჟურნალი “ექსპერიმენტული და კლინიკური მედიცინა”. N: 28. 2006. დეპონენტი პროფესორ თეიმურაზ ჩიგოგიძის საერთო რედაქციით.
.